Son zamanlar mövsümün sonunda Kevin Medinanın "Qarabağ"dan ayrılacağına dair məlumatlar yayılmaqdadır.
Buna səbəb müdafiəçinin müqaviləsinin sona çatması, yeni anlaşmaya imza atmaması göstərilir.
Medinanın son 4 matçda ehtiyatda qalması şübhələri bir qədər də artırıb.
Lakin "Neftçi" ilə oyundan sonra "Qarabağ"ın baş Qurban Qurbanov bu cür söhbətlərin reallığı əks etdirmədiyini, Kevinin "Qarabağ"la daha 2 illik müqaviləsi olduğunu deyib.
Məsələyə aydınlıq gətirmək üçün klubun mətbuat xidmətinin rəhbəri Anar Hacıyevə müraciət etdik.
Sportinfo.az xəbər verir ki, sportal.az-a açıqlama verən "Qarabağ"ın sözçüsü Qurban Qurbanovun dediklərini təsdiqlədi:
"Bəli, Qurban müəllimin dediyi kimi, Medinanın "Qarabağ"la daha 2 il müqaviləsi var.
Onun anlaşması bu mövsümün ilk yarısında artırılıb, müqaviləsi 2027-ci ilin yayında bitəcək".
